BIOGRAFIA DE LES PERSONES, GRUPOS Y ASOCIACIONES QUE VAN INTERVENIR NES  XORNAES PER ORDE ALFABÉTICU

  •  
  • CARMEN ADAMS

Doctora n'Historia del Arte, Profesora Titular Universidá d'Uviéu. Vien desenvolviendo'l so llabor profesional n'España y Llatinoamérica (República Dominicana, Cuba, Ecuador, Perú…). Paga la pena destacar dellos proyectos d'investigación y contratos con empreses, dirección de cursos y seminarios, amás de publicaciones sobre arquitectures pal turismu y rexeneración patrimonial. Forma parte de dos grupos d'investigación consolidaos: Investigación en Patrimoniu d'Asturies (INPASTUR) de la Universidá d'Uviéu y Arte y Patrimoniu Cultural de la Edá Contemporánea (ARPACEC) de la UNED. Árees d'interés: patrimoniu, turismu, arquitectura, América, hotel, Identidaes nacionales. 

  • ASOCIACIÓN SANTA BÁRBARA (MIERES)

Naz en 2002 cola intención de recuperar les fiestes de Santa Bárbara en Mieres. Cuenta con más de 1400 socios y socies que lleven a cabu diferentes actividaes nel conceyu al traviés de dellos grupos  y secciones. La sección d'arqueoloxía industrial punxo en marcha nestos años una montonera actividaes (esposiciones, presentaciones de llibros, etc.). A esta sección pertenecen les intervenciones en dellos elementos de patrimoniu industrial ente les que rescamplen: confección d'un archivu dixital d'arqueoloxía industrial del valle del Caudal, recuperación de socavón de San  Vítor y la Rebaldana o, la más de recién, recuperación del cementeriu protestante de la fábrica de Mieres.

  • ASOCIACIÓN VINDONNUS

Asociación formada por un grupu persones preocupaes pol patrimoniu cultural de L.lena, persiguiendo'l so estudiu, conservación, recuperación y espardimientu. Ente les actividaes que desenvuelven podríen señalase les rutes comentaes del programa "Sabios paseos; caminar y conocer L.lena", la organización añal de les Xornaes de Patrimoniu Cultural y la edición de la revista Vindonnus, ente otres actividaes de difusión, amás de collaboraciones con otros colectivos. Trabayen de forma activa en diferentes reivindicaciones, ente les que rescamplen la restauración de les pintures murales de Bendueños, la recuperación de vieyos tramos del Camín de Santiago y la conservación y puesta en valir del Puertu Ferroviariu de Payares, ente otros.

  • GUILLERMO BAS ORDÓÑEZ

(Mieres, 1983) Ye llicenciáu n'Historia del Arte pola Universidá d'Uviéu y Doctor pola UNED, institución na qu'anguaño exerce como profesor-tutor. Buena parte de la so trayectoria investigadora tuvo venceyada al patrimoniu industrial y a la historia del ferrocarril, en 2010 ganó'l premiu  investigación "Padre Patac" por un trabayu sobre la construcción del ferrocarril de Payares. Ye autor de dellos testos sobre estos temas y collabora en publicaciones como la Revista de Historia Ferroviaria.

  • MARÍA DEL MAR DÍAZ

Historiadora del Arte, profesora de Historia del Arte na Universidá d'Uviéu ye especialista n'Arte Contemporánea, Arte gráficu, Patrimoniu Industrial y Patrimoniu Artísticu. Ye especialista tamién en llitografía industrial, serigrafía y grabáu. Ente les sos obres últimes rescamplen: Asturias litografiada: El comercio y la industria en imágenes, 1900-1970, y los artículos: La escuela primaria de la minería en el Concejo de Aller (Asturias). Del primer franquismo al tardofranquismo 1940-1975  o  La colonia de san Feliz un poblado de empresa vinculado a la fábrica de Armas de Oviedo (1921).

  • MARÍA FERNANDA FERNÁNDEZ GUTIÉRREZ

Historiadora del Arte y Guía Oficial de Turismu del Principáu d'Asturies. Especializada en patrimoniu cultural asturianu, fundamentalmente industrial y tamién etnográficu. Trabayó en formación, investigación, planiamientu, redacción y divulgación de cuestiones rellacionaes a l'arquitectura ya inxeniería contemporáneo y a la minería y otros temes próximos, baxo la firma Pozu Espinos. Consultoría y xestión cultural.

  • JAVIER FERNÁDEZ LÓPEZ

Director del Muséu de Ferrocarril d'Asturies por oposición dende 1992. Siempre venceyáu al patrimoniu históricu industrial y ferroviariu asturianu vien asesorando nuna montonera iniciatives pa la so restauración y recuperación. Redactó l'apartáu de bienes muebles ferroviarios del Inventariu de la Conseyería de Cultura d'Asturies. Autor de munches investigaciones sobre la historia del ferrocarril y collaborador en publicaciones periódiques, congresos y xornaes de patrimoniu industrial y ferroviariu, el so espardimientu y aplicación turística. Miembru de a Comisión de Patrimoniu Históricu Industrial del Principáu d'Asturies y vocal de normativa de l'Agrupación de Ferrocarriles Históricos Españoles.

  • LUIS BENITO GARCÍA ÁLVAREZ

Álvarez ye Doctor n'Historia (premiu estraordinariu de doctoráu) y profesor de la Universidá d'Uviéu. Foi responsable investigación de la Fundación-Muséu de la Sidra ya investigador na European Science Foundation. Llevó dos premios Gourmand (2006 y 2008) por Beber y saber (Alianza, 2005 —2ª ed. 2008—) y Las representaciones de la sidra. Designólu'l gobiernu d'Asturies, col sofitu unánime de la Xunta General del Principáu, pa documentar la candidatura de la cultura de la sidra como Patrimoniu de la Humanidá pola UNESCO. Ye director científicu del programa Conoce y Vive tu Patrimonio del Área de Cultura del Ayuntamientu de Llaviana.

  • MÓNICA GARCÍA CUETOS

Doctora n'Historia del Arte. Ye autora de dellos trabayos, proyectos y memories técniques sobre la historia y el patrimoniu históricu industrial, formando parte'l grupu que redactó la Memoria Técnica ya Histórica de la Sociedá Hulleras del Turón-Pozu Santa Bárbara. Foi responsable del Departamentu de Documentación y Formación, Archivu Documental y Fondos del Muséu de la Siderurxa dende la so fundación hasta'l branu de 2013. Ganadora del premiu d'Investigación Padre Patac, en 2014, cola obra: La palabra y la forma. Las primeras obras del ingeniero José Eugenio Ribera en Asturias a través de sus escritos.

  • ROBERTA GARRUCCIO

Università degli studi di Milano. Les sos investigaciones siempre tuvieron centraes na historia de la empresa nel llargu plazu, prestando especial atención a la construcción de fuentes orales, archivos y ferramientes d'análisis culturales pa les organizaciones y pa los mercaos.
La intención ye recuperar la historia social y la historia del trabayu, aportar suxerencies teóriques microeconómiques, y estudios culturales qu'esploren aspectos descuidaos o incluso completamente ignoraos pol papel tradicional y les fuentes corporatives, como la función de la suxetividá, la identidá, la confianza, la reputación y la diversidá nes instituciones como la empresa, les asociaciones y el mercáu.
Actualmente ocúpase de la des-industrialización y tresformación urbana n'Europa con especial atención al contestu de Sesto San Giovanni. Dalgunes de les sos publicaciones son: - Los hombres y el trabajo en Olivetti, editáu por F. Novara, R. Rozzi, R. Garruccio, Milán, Bruno Mondadori, 2005 - Las voces de trabajo. Desde los años setenta hasta ahora: la globalización y los cambios en la fábrica Pirelli, Roma-Bari, Laterza 2012. Sobre la película que vamos ver, Il polline e la ruggine, podemos dicir que la película surde d'un proyectu de investigación lleváu a cabu por Roberta Garruccio, Sara Zanisi y Sara Roncaglia, que permitió xuntar cerca de 50 entrevistas a fondu con empresarios, sindicalistes, líderes y homes y muyeres trabayadores de les empreses abandonaes. La investigación texó esta documentación oral qu'agora se conserva na Fundación Isec con una estensa documentación de los archivos, incluyendo fotografíes, películes, mapes, planos. Con ello quier contribuir a preservar y dar a conocer les narratives y representaciones d'un llugar tresformáu pola industrialización, Sesto San Giovanni, centrándose en particular na venta de la fábrica aceru Falck y nos mui diferentes significaos pa les persones involucraes nesi procesu.

  • GRUPO RUTAS LIBERTARIAS (CLOT-CAMP, BARCELONA)

Grupu de persones qu'habitando'l barriu del Clot-Camp en Barcelona deciden nel añu 2011 empezar a realizar rutes históriques per espacios significativos de les diferentes lluches sociales en tala zona. A partir de la información oral facilitada polos vecinos y vecines de más edá, buciando en periódicos, memories, llibros y delles publicaciones, esti grupu reconstrúi la historia de forma autónoma y autoxestionada. Percuerren diferentes espacios de les lluches nel barriu, dende los escenarios de la creación de cooperatives obreres de consumu en 1866, a la visita a antiguos ateneos naturistes de 1927, un percorríu peles fábriques y la historia de les fuelgues, la historia de les barriaes y los grupos de defensa obrera o las más recientes lluches vecinales o los centros sociales okupaos. Más información

  • TOÑO HUERTA

Toño Huerta (Trubia, 1976), ye xeógrafu, investigador y profesional autónomu nel campu del patrimoniu y el análisis territorial. Tanto nos sos llibros y artículos como nos sos proyectos la vertiente crítica pa cola situación del patrimoniu, n'especial l'industrial, ye una constante siempre en contactu cola comunidá local. Redactó dellos proyectos sobre catalogación, proyectos museísticos, diseñu d' itinerarios y rutes, formación y coordinación de xornaes sobre patrimoniu.

  • GUILLERMO LAINE SAN ROMÁN

Inxenieru de Mines. Coordinador Técnicu de SADIM, Grupu Hunosa. Autor de munchos proyectos rellacionaos cola recuperación del patrimoniu xeológicu y mineru, ente los que rescamplen, Almadén, Sotón, Arnao, la Cueva del Soplao. Ponente en diferentes foros de Patrimoniu como son, Universidá de Huelva, Universidá d'Alicante, dellos congresos de patrimoniu mineru. Perteneciente a INCUNA, TICHHI, ACTE. La so vida profesional trescurrió en Minería Metálica, Minería de Carbón, tanto n'interior como en cielu abierto, y tamién n'oficina técnica con manexu de ferramientes de xestión basaes nel territoriu.

  • MARI PAZ LÓPEZ

Llicenciada en Xeografía ya Historia (Historia del Arte y d'España), Esperta Universitaria n'Ordenación del Territoriu y Urbanismu y Máster en Museografía Didáctica. Redectó munchos artículos sobre Urbanismu y Patrimoniu, amás d'un trabayu d'investigación sobre Carbones de La Nueva y el capítulu dedicáu a Llangréu nel Diccionariu Xeográfico d'Asturies ente otros. Combinó'l so trabayu na TXSS cola so actividá política (Conceyala d'Urbanismu de Llangréu ente 1999 y 2003) y como miembru del Conseyu de Patrimoniu Cultural en delles lexislatures.

  • MANUEL MAURÍN ÁLVAREZ

Profesor Titular d'Análisis Xeográficu Rexonal de la Universidá d'Uviéu y Coordinador del Máster Universitariu en Recursos Territoriales y Estratexes d'Ordenación. Doctor en Xeografía, ye autor de múltiples publicaciones científiques, munches d'elles rellacionaes cola Ordenación del Territoriu, de los Recursos y del Patrimoniu Natural y Cultural, especialmente nel contestu de les zones mineres españoles y asturianes.

  • JORGE MUÑIZ

Jorge Muñiz ye doctor n'Historia y tien participao en munchos proyectos d'investigación sobre prensa, minería ya historia local. L'interés pola historia comparada llevólu a desenvolver estancies nes universidaes de Tours y Paris 1 Panthéon-Sorbonne que-y permitieron obtener el Doctoráu Européu y, más tarde, investigar sobre les mines del Norte de Francia gracies a un contratu postdoctoral del Plan de I+D+I del Principáu d'Asturies. Les sos principales llinies d'investigación son la historia sociocultural ya industrial dientro d'una perspectiva interdisciplinar.

  • ANA PIQUERO

Arquitecta pola Universidá Politécnica de Madrid, técnica urbanista pol Institutu Nacional d'Alministraciones Públiques. Collaboración en cursos, artículos y ponencies sobre Catálogos Urbanísticos y Arquitectura Industrial del movimientu modernu (DO.CO.MO.MO). Miembru del equipu redactor de la ponencia sobre la Fábrica d'armes d'Uviéu, nel que trabayó dientro'l grupu urbanismu del Colexu Oficial d'Arquitectos d'Asturies.

  • OSCAR RODRÍGUEZ CAVIELLES

Llicenciáu en Xeografía y Téc. Sup. n'Información y Comercialización Turística. Collaboró na redacción de delles guíes y proyectos, y publicó diferentes artículos amás de participar en congresos internacionales, xornaes y talleres venceyaos al patrimoniu industrial. Trabayó nel Muséu de la Siderurxa y nel Ayuntamientu de Llangréu como Técnicu de Turismu. Anguaño desenvuelve la so actividá nel Ecomuséu Mineru Valle de Samuño demientres ellabora una tesis doctoral sobre los paisaxes industriales asturianos.

  • DIANA SÁNCHEZ MUSTIELES

Dra. arquitecta pola Universidad Superior d'Arquitectura de Valencia (UPV), miembru d'ICOMOS. Investigadora de patrimoniu industrial, sobre too no que significa la so valoración, reutilización y espardimientu. Autora y xestora del Blog Patrimoniu Industrial Arquitectónicu (conocíu a nivel nacional ya internacional). Realización de comunicaciones, cursos y ponencies que traten el Patrimoniu Industrial en diferentes ámbitos. Asesoramientu d'entidaes y asociaciones en Patrimoniu Industrial. Ilustradora autodidacta enamorada de les antigües instalaciones industriales.

  • MARTA SANTOFIMIA ALBIÑANA

Máster n'Arquitectura, el so llabor profesional céntrase na xestión cultural del patrimoniu industrial. Demientres cuatro años trabayó nel Institutu Andaluz de Patrimoniu Históricu dende'l que dirixó'l proyectu Patrimonio Industrial de Andalucía. Les sos llinies de trabayu desenvuélvense nel campu'l patrimoniu contemporáneu, paisaxe cultural, intervención n'espaciu públicu y rehabilitaciones singulares d'interés etnolóxicu. Punxo en marcha productos culturales como Arquitectura de Andalucía o Minas de Sierra Morena.

  • JOSÉ LUIS SOTO

Cursa estudios de dellineación. En 1982 entra na empresa HUNOSA na que realiza diferentes funciones hasta l'añu 2004 cuando se pre-xubila de la mesma cola categoría de vixilante mines. Dende va años forma parte de l'Asociación Santa Barbara, na que desenvuelve funciones rellacionaes cola recuperación del patrimoniu arqueolóxicu industrial na  la sección d'arqueoloxía. A esto suma'l so llabor d'espardimientu del patrimoniu al traviés de dos obres lliteraries. Realizó tamién delles esposiciones fotográficas en solitariu y en compañía d'otros. Tamién publicó diferentes trabayos en prensa.

  • FAUSTINO SUÁREZ ANTUÑA

Ye Llicenciáu y Doctor en Xeografía ya Historia pola Universidá d'Uviéu. La so Tesis Doctoral llevó'l Premiu investigación Padre Patac 2005, dando como resultáu'l llibru Carbón para España. La organización de los espacios hulleros asturianos. La so investigación, desenvuelta nel campu la Xeografía y el Patrimoniu Cultural volcóse en diferentes aportaciones a congresos, xuntes científiques y munches publicaciones. Ye Vicepresidente d'INCUNA (Industria, Cultura y Naturaleza. Asociación d'Arqueoloxía Industrial). De forma paralela, exerció como consultor nes árees d'análisis territorial y Patrimoniu, participando tamién en dellos proyectos urbanísticos y culturales.

  • NATALIA TIELVE GARCÍA

Profesora Titular d'Historia del Arte de la Universidá d'Uviéu. Ye Doctora n'Historia del Arte, Premiu Estraordinariu de Doctoráu. Vocal del Conseyu de Patrimoniu Cultural del Principáu d'Asturies y de la Comisión de Patrimoniu Históricu Industrial. Secretaria de l'Asociación d'Arqueoloxía Industrial INCUNA. Cuenta con una reconocida trayectoria investigadora nesti ámbitu d'estudiu.

  • SERGIO TOMÉ FERNÁDEZ

Profesor Titular d'Análisis Xeográficu Rexonal de la Universidá d'Uviéu. Doctor en Xeografía. Participó en diferentes proyectos rellacionaos colos paisaxes urbanos y naturales d'Asturies, con especial mención al desarrollu urbanu d'Uviéu dende mui diversos puntos de vista, destacando los barrios ocultos y obreros en contraposición a la ciudá burguesa y el so desarrollu nos sieglos XIX y XX.

  • RUBÉN VEGA

Profesor d'Historia Contemporánea de la Universidá d'Uviéu. Responsable del Archivu de Fuentes Orales pa la Historia Social d'Asturies. Les sos llinies d'investigación céntrense nel asociacionismu, nes cultures del trabayu, nel movimientu obreru, nes organizaciones sindicales, na conflictividá social y nos procesos de desindustrialización. Ye, amás, especialista n'Historia Oral.

  • NURIA VILA ÁLVAREZ

Historiadora, responsable del Centru de Documentación del Muséu del Ferrocarril d'Asturies. Especialista en vivienda obrera, autora del llibru Un patio Gijonés. La ciudadela de Celestino González Solar (1877-1977), ente otros artículos y publicaciones sobre'l mesmu tema .

  • CELIA VILAR LORENZO

Graduada en Turismu pola Universidá d'Uviéu. Guía de turismu habilitada nel Principáu d'Asturies dende 2009. Dende 2005 trabaya como Técnicu de Turismu del Ayuntamientu d'Ayer, desempeñando llabores de planificación y xestión del conceyu como destín turísticu. D'igual forma, ye responsable de la xestión del Sistema Integral de Calidá Turística Española en Destinos nel ámbitu territorial d'Ayer, llevando a cabu la formación, asesoramientu y evaluación d'empreses turístiques nel programa. Responsable del diseñu y execución del programa de visites guiaes que vien ufiertando l'Ayuntamientu d'Ayer dende 2005 col envís de poner en valir el patrimoniu cultural del conceyu.